وأشارت جورى بكر خلال مداخلتها بتليفزيون اليوم السابع مع الزميل جمال عبد الناصر، أن محمد سامى قال لها: "الدور دا هيغير حياتك تماماً ولما فعلا قريته حسيت كدا، وفعلاً الدور دخل كل البيوت المصرية بالوطن العربى، وكان تحديا بالنسبة لى إنى أغير من جلدى فحبيت التحدى دا واطمنت إنى أعمله بجدارة الحمد لله".
 

وحول مقابلتها شخصية مثل وداد فى الواقع كشفت جورى بكر قائلة: "وداد دى موجودة فى كل عيلة وبيت من البيوت المصرية، اللى هيا سلفة، وفى منهم الغيورين والحاقدين اللى عاوزين يأذوك ويدمروا حياتك بأى طريقة وبيبقوا من أهل البيت نفسه، وللأسف مفيش حد مؤذى غير من الناس اللى من لحمك ودمك ومن أهل بيتك، فدى حاجة بسيطة اللى وداد عاملاه فى الشخصية وإحنا للأسف يبحصل عندنا حاجات أكتر من كدا".
 

وتجسد جورى بكر في أحداث مسلسل جعفر العمدة شخصية وداد المتزوجة من ابن عمتها سيد العمدة (أحمد فهيم) الشقيق الأكبر لـ جعفر العمدة (محمد رمضان)، ومع مرور الأحداث تنكشف شخضية وداد بأنها طماعة واستغلالية وحصلت من زوجها على 5 مليون جنيه لفتح مشروع مركز ميك اب وخلعته بدون علمه للتزوج من عدو عائلة زوجها الأول شوقى فتح الله (منذر رياحنة).
 

وتفاعل الجمهور مع شخصية وداد خلال الحلقات الماضية وتحديداً بعد مشهد زواجها من شوقى فتح الله واعلانها خلع زوجها ووصل هذا التفاعل لهجوم حاد عليها عبر صفحات السوشيال ميديا لتخرج وترد على حسابها بموقع انستجرام، "فضلاً وليس أمرًا أرجوكم ده تمثيل أنا عارفة  مش قصدكم بس كفاية سب وقذف وشتائم وحسبى الله ونعمة الوكيل وربنا ينتقم وحاجات كتير كأنكم بتدعو عليا صدقونى الكلام ده بيأذينى نفسيًا عيب عيب عشان كده مش بعمل شير لناس كتير احترامًا لأهلى وزوجى شكرًا".المسلسل بطولة محمد رمضان، زينة، هالة صدقى، إيمان العاصى، مى كساب، منة فضالى، أحمد داش، منذر رياحنة، عصام السقا، فريدة سيف النصر، مجدى بدر، أحمد فهيم، فتوح أحمد، سلوى عثمان، فريدة سيف النصر، جورى بكر، طارق النهرى، أحمد عبد الله، احسان الترك وضيف الشرف بيومى فؤاد، ومن تأليف وإخراج محمد سامى، وشارك فى السيناريو والحوار مهاب طارق وإنتاج شركة ميديا هب سعدى – جوهر.